Векавы юбілей адзначае сёлета Ельскі раён. Днем яго утварэння лічыцца 17 ліпеня 1924года. (Да 5 лютага 1931года назва была – Каралінскі). Паводле гістарычных звестак, у 1924 годзе на Ельшчыне мелася 5 прыватных гарбарняў, 13 млыноў (9 паравых і 4 вадзяных), 2 ваўначоскі, 2 масларобчыя заводы (прыватны і кааператыўны), цагельны, 2 лесапільныя, смалакурны заводы. У Ельску былі створаны дзве кустарныя арцелі – шавецкая і кравецкая.
  У 1925 годзе  ў раёне дзейнічала 32 гандлёва-прамысловых прадпрыемствы. 27 лістапада 1925 года праз Вышэйшы савет народнай гаспадаркі БССР была зарэгістравана арцель “Чырвоны пільшчык”. У 1928 годзе ў сувязі з цяжкім эканамічным становішчам арцелі, да яе была далучана арцель “Чырвоны хімік”. У 1935годзе “Чырвоны пільшчык” быў перапрафіліраваны на вытворчасць мэблі.
   Летам 1936 года у Ельску была пабудавана першая электрастанцыя, дзякуючы якой электрычнасць з’явілася у Доме культуры, памяшканнях райкома партыі і райвыканкама.  У 1937-1938гг. была пабудавана больш магутная электрастанцыя з газагенератарным рухавіком магутнасцю 150 конскіх сіл і электрагенератарам 125 кілават. Працягласць лініі электраперадачы склала каля 2 кіламетраў.
       У 1937 г. у Ельску пабудаваны будынак раённай бальніцы на 50 ложкаў.
       У 1939г у раёне працавалі 13 хат чытальняў, 45 бібліятэк.
У адвечнай гісторыі раёна былі як пазітыўныя моманты, так і глыбока трагічныя падзеі. У перадваенныя гады раён хутка рос і развіваўся, а матэрыяльны і культурны ўзровень насельніцтва, дабрабыт людзей паляпшаліся. Аднак мірная стваральная праца жыхароў Ельшчыны, усе іх планы і задумы былі разбураны вераломным нападам фашысцкай Германіі.
     З 23 жніўня 1941 года Ельскі раён быў акупаваны нямецка-фашысцкімі захопнікамі. Падчас акупацыі фашысты спальвалі вёскі, забівалі мірных людзей, моладзь зганялі на прымусовыя  работы ў Нямеччыну. Вёскі Забалацце, Капанка, Круглае паўтарылі лёс Хатыні (увекавечаны ў мемарыяльным комплексе «Хатынь»).
      Усяго за гады Вялікай Айчыннай вайны загінула 4677 жыхараў Ельскага раёна.
      Аднаўленне разбуранай вайной гаспадаркі заставалася галоўнай задачай на працягу многіх гадоў.
  Асабліва хуткімі тэмпамі вялося будаўніцтва ў 60–70 гады. Росквіт эканомікі прыпаў на 70-я гады. Ствараліся новыя прадпрыемствы, узводзіліся новыя мікрараёны, пашыралася сацыяльная інфраструктура.
     У 1971 годзе Ельску быў нададзены статус горада.
  Дзякуючы меліарацыі, у 70-х гадах на месцы асушаных балот быў пабудаваны новы населены пункт Зашыр’е, архітэктар за праект атрымаў вышэйшую узнагароду СССР, так як у  постсавецкі час пасёлак Зашыр’е некалькі разоў перамагаў у рэспубліканскім аглядзе-конкурсе добраўпарадкавання і афіцыйна стаў аграгарадком адным з першых у краіне. Зашыр'е – спадарожнік саўгаса-гіганта "Камуніст", які некалькі разоў дамагаўся асобнага месца на дошцы гонару цэнтральнай ВДНГ у Маскве.
     У 1986 г. Чарнобыльская навала закранула сваім чорным крылом і Ельскі раён. З карты раёна знікла 8 вёсак, 5600 жыхароў Ельшчыны былі адселены ў чыстыя зоны. Памяць аб іх захавалася ў Ельскай раённай бібліятэцы, дзе была створана экспазіцыя “Ельскі фартушок”.Сення экспазіцыя налічвае каля 800 экспанатаў, вышытых і вытканых умелымі рукамі майстрых-рукадзельніц, дзе кожная рэч – гэта жывая памяць пра чалавека і яго маленькую радзіму.Экспазіцыя “Ельскі фартушок” стала брэндам раёна, як частка гісторыка-культурнай спадчыны свайго  регіёна.
 Сення ў этнаграфічным кутку ладзяцца экскурсіі, краязнаўчыя і фальклорныя мерапрыемства, цягнецца каляровая нітачка мудрасці ад былога пакалення да будучага.
   Асаблівым упрыгожваннем горада з'яўляецца Троіцкая царква – помнік  народнага драўлянага дойлідства, пабудаваная ў 70-х гадах 18 стагоддзя ў класіцыстычным стылі. У царкве зберагаецца мясцовая святыня – копія з Васькаўскага цудатворнага абраза Божай Маці. У Ельскім раёне 8 аб'ектаў маюць статус гісторыка-культурнай каштоўнасці Рэспублікі Беларусь. Сярод іх фальклорны аўтэнтычны гурт вёскі Казлы.
   Адзін раз у два гады на Ельшчыне праводзіцца рэгіянальны фестываль гарманістаў “Грай , гармонік!”.
   У горадзе ёсць кінатэатр, краязнаўчы музей і раённы цэнтр рамёстваў, саломапляценне майстрых якога – элемент нематэрыяльнай культурнай спадчыны, які ўвайшоў у спіс гісторыка-культурных каштоўнасцей РБ. Тут праводзяцца выставы і майстар-класы па дэкаратыўна-прыкладным мастацтве. Турыстам  на Ельшчыне прапануюцца цікавыя турыстычныя маршруты, якія знаёмяць з традыцыямі краю, яго гісторыяй і культурай.
  Аграпрамысловы комплекс раёна прадстаўлены 4 камунальнымі сельскагаспадарчымі унітарнымі прадпрыемствамі: “Добринь”, “Ельск”, “Скороднянский”,  “Совхоз Коммунист” и ААТ “Мозырьсоль”. Раён спецыялізуецца на вытворчасці малака, мяса збожжавых, курурузы.
     Прамысловы патэнцыял раёна складаюць 3 прадпрыемствы: філіял ААТ «Мозырский ДОК» Ельская мебельная фабрика», КЖЭУП «Ельское» і ТАА “Ельсклес”.
  Асаблівая ўвага надаецца развіццю прыватнага бізнеса. У раёне зарэгістраваны 171 прыватны прадпрымальнік і 60 юрыдычных асоб прыватнай формы ўласнасці.
    Пашырылася гандлёвая сетка раёна і ўдасканалілася сфера сацыяльных паслуг.
      У раёне ёсць усе ўмовы для камфортнага пражывання.

                                                                Падрыхтавала Г.Трафімава